អបអរសាទរ ការទទួលបានអាជ្ញាប័ណ្ណ ប្រកបអាជីវកម្ម

នាព្រឹកថ្ងៃទី ១១ ខែ កុម្ភៈ ឆ្នាំ ២០១៧ គ្រឹះស្ថានមីក្រូហិរញ្ញវត្ថុឯកជន វិថីម៉ាយក្រូហ្វាយនែន ម.ក បាន​អបអរ​សាទរ​ការ​ទទួល​បាន​អាជ្ញា​ប័ណ្ណ​ប្រកប​អាជីវកម្ម​ជា​ផ្លូវ​កា​រ​ពី​ធនាគារ​ជាតិ​នៃ​កម្ពុជា​ក្រោម​អធិបតីភាព​ លោក​ឧកញ៉ា​ បណ្ឌិត​ ប៊ុន​ មុនី​ ប្រធាន​ក្រុម​ប្រឹក្សាភិបាល​គ្រឹះស្ថាន​ឯកជន​ វិថី​ម៉ាយក្រូហ្វាយនែន​ ម.ក​។​  

 

 

លោក លី សុភ័ក្តិ​ ប្រធាននាយកប្រតិបត្តិ​ គ្រឹះស្ថាន​មីក្រូហិរញ្ញវត្ថុ​ឯកជន​ វិថី​ម៉ាយក្រូហ្វាយនែន​ ម.ក​ បាន​លើក​ឡើង​ពី​ប្រវត្តិ​របស់​គ្រឹះស្ថាន​នេះ​គឺ​កើត​ឡើង​ចាប់​ផ្តើម​ពី​អង្គការ​ស្ថាបនា​សហគមន៍​កម្ពុជា​ដែលជា​អង្គការ​គ្រីស្ទាន​ និង​ជា​អង្គការ​ក្រៅ​រដ្ឋាភិបាល​មួយ​ ដែល​មាន​ច្បាប់​អនុញ្ញាតិ​ពី​ក្រសួង​មហាផ្ទៃ​លេខ​ ៧៧០​ សជណ​ ចុះ​ថ្ងៃ​ទី២៩​ ខែសីហា​ ឆ្នាំ១៩៩៦​។​​ក្នុង​គោល​បំណង​ចូល​រួម​ចំណែក​កាត់​បន្ថយ​ភាព​ក្រីក្រ និង​សំដៅ​គាំទ្​រដល់​ការ​លើក​កំពស់​ជីវភាព​រស់​នៅ​របស់​ប្រជាពល​រដ្ឋ​ក្នុង​សហគមន៍​ក្រីក្រ​ទូទាំង​ព្រះរាជាណាចក្រកម្ពុជា​។​

រហូតមកទល់បច្ចុប្បន្ន​ គ្រឹះស្ថានមីក្រូហិរញ្ញវត្ថុឯកជន​ វិថី​ម៉ាយក្រូហ្វាយនែន​ ម.ក​​ មាន​ម្ចាស់​ភាគ​ហ៊ុន​ចំនួន​​២​ធំៗ​គឺ​ អង្គការ​ស្ថាបនា​សហគមន៍​កម្ពុជា​កាន់​កាប់​ភាគ​ហ៊ុន​ចំនួន​ ៦០%​ និង​ឯកជនពីរ​ផ្សេង​ទៀត​កាន់​កាប់​ភាគហ៊ុន​ចំនួន​ ៤០%​ ដែល​ការ​វិនិយោគ​សរុប​មាន​ចំនួន​ ៤.៥០០.០០០​ ដុល្លារអាមេរិក​ និង​ កំពុង​ប្រតិបត្តិការ​ក្នុង​ រាជធានីភ្នំពេញ​ និង​ខេត្តកណ្តាល​ ដែល​មាន​៤ការិយាល័យ​ (រាជធានីភ្នំពេញ​ ស្រុកស្អាង​ ស្រុកកោះធំ​ និងស្រុកខ្សាច់កណ្តាល​)​ ជាមួយ​បុគ្គលិក​សរុបចំនួន​ ៦៤នាក់​។​ គិតត្រឹម​ដំណាច់​ឆ្នាំ២០១៦​ គ្រឹះស្ថាន​មាន​សមតុល្យ​ឥណទាន​សរុប​ ចំនួន​ ៣.៥០០.០០០​ ដុល្លារអាមេរិក​ និងមាន​អតិថិជន​ចំនួន​ ៣.០០០នាក់​។​ ដោយមើល​ឃើញថា​វិស័យ​មីក្រូហិរញ្ញវត្ថុ​ នៅតែ​មាន​តួនាទី​យ៉ាង​សំខាន់​ក្នុងការ​ចូល​រួម​ចំនែក​ អភិវឌ្ឍ​សេដ្ឋកិច្ច​របស់​ប្រទេសកម្ពុជា​ និង​តំរូវការ​ចាំបាច់​របស់​ប្រជាពលរដ្ឋ​ និង​ហិរញ្ញវត្ថុ​គឺជា​សសៃឈាម​នៃ​សេដ្ឋកិច្ច​ដែលនោះ​ គ្រឹះស្ថាន​ឯកជន​ វិថី​ម៉ាយក្រូហ្វាយនែន​ ម.ក​ បាន​លើក​ផែន​ការ​ជាបឋម​ក្នុងការ​ពង្រីក​ទីផ្សារ​របស់​ខ្លួន​អំឡុង​ពេល​ប្រាំឆ្នាំ​ខាងមុខ​នេះ​ចាប់ពី​ឆ្នាំ​ ២០១៧-២០២១​ ដោយ​ពង្រីកតំបន់​ប្រតិបត្តិការ​ចំនួន​ ៥៥ការិយាល័យ​បន្ថែម​ទៀត​នៅ​ទូទាំង​រាជធានី​ ខេត្ត​ក្នុង​ព្រះរាជាណាចក្រកម្ពុជា​ រួម​ជា​មួយ​និង​ចំនួន​បុគ្គលិក​សរុប​រហូតដល់​ ៧៣០នាក់​ និង​ទំហំ​សមតុល្យ​ឥណទាន​រហូតដល់​ ៦៨, ០០០,០០០​ ដុល្លារអាមេរិក​ ​។​
យុទ្ធសាស្រ្តរបស់គ្រឹះស្ថានឯកជន​ វិថី​ម៉ាយក្រូហ្វាយនែន​ ម.ក​ គឺសំដៅ​បំពេញ​ចន្លោះ​ខ្វះខាត​ដែល​ទីផ្សារ​ហិរញ្ញវត្ថុ​កំពុង​ជួប​ប្រទះ​ ពោល​គឺ​អតិថិជន​ក្រីក្រ​ដែល​ត្រូវ​ការ​កម្ចី​ខ្នាតតូច​ ដែល​គ្រឺះស្ថាន​ធំៗ​មិន​បាន​បំពេញ​តំរូវការ​នេះ​ ហើយយើង​មើលឃើញថា​ចំណែក​ទីផ្សារ​ក្នុងវិស័យ​នេះ​ មាន​ទំហំ​ធំ​ដែលត្រូវ​បំពេញ​បន្ថែម​។​ 
គ្រឹះស្ថានឯកជន​ វិថី​ម៉ាយក្រូហ្វាយនែន​ ម.ក​ បេ្តជ្ញា​ចូល​រួម​អភិវឌ្ឍន៏​សេដ្ឋកិច្ច​ប្រទេសកម្ពុជា​អោយ​បាន​ជោគជ័យ​ ដោយ​គោរព​តាម​ច្បាប់រដ្ឋ​ និង​បទ​បញ្ញត្តិ​របស់​ធនាគារ​ជាតិនៃកម្ពុជា​ អោយ​បាន​ល្អ​ប្រសើរ​ ដើម្បី​ធានា​ការ​រីក​ចំរើន​ប្រកប​ដោយ​និរន្តភាព​។​

 

 

លោកឩកញ៉ា បណ្ឌិត ប៊ុន មុនី​ ប្រធាន​ក្រុម​ប្រឹក្សាភិបាល​ គ្រឹះស្ថាន​ឯកជន​ វិថី​ម៉ាយក្រូហ្វាយនែន​ ម.ក​ បាន​មាន​ប្រសាសន៍​ថាៈ​ សេវាកម្ម​មីក្រូហិរញ្ញវត្ថុ​គឺ​ដើរតួ​នាទី​សំខាន់​ណាស់​ក្នុងការ​អភិវឌ្ឍន៍​សេដ្ឋកិច្ច​ជាតិ​ពីព្រោះ​សេវាកម្ម​នេះ​បាន​បំរើ​សេវា​ជូន​ដល់​ប្រជាពលរដ្ឋ​នៅ​តាម​ទីភូមិ​ ជន​បទ​ដាច់​ស្រយាល​នា​នា​ អាច​និយាយ​បាន​ថា​គ្រឹះស្ថាន​មីក្រូហិរញ្ញវត្ថុ​គឺជា​ “ កូនសោចាក់ទំលាយភាពក្រីក្រ “​ ដូចនេះ​ឆ្លង​តាម​រយៈ​បទពិសោធន៍​ជាច្រើន​ឆ្នាំ​កន្លង​មក​លោក​មើលឃើញ​ថា​ការ​ប្រកប​អាជីវកម្ម​ប្រកប​ដោយ​ក្រម​សីលធម៌​វិជ្ជា​ជីវៈ​នឹង​នាំ​អោយ​ វិស័យ​នេះ​ទទួល​បាន​ជោគជ័យ​រហូត​ដល់​បច្ចុប្បន្ន​ ដូចនេះ​ វិថី​ម៉ាយក្រូហ្វាយនែន​ ម.ក​ និង​បំពាក់​បំប៉ន​សមត្ថភាព​ជំនាញ​ឲ្យ​បាន​គ្រប់គ្រាន់​ដល់​បុគ្គលិក​របស់​ខ្លួន​ក្នុង​ការ​ប្រតិបត្តិការ​ ដើម្បី​បំរើ​សេវាកម្ម​ជូន​ប្រជាពលរដ្ឋ​ ធានា​ឲ្យ​បាន​នូវ​និរន្តរភាព​ទាំង​ស្ថាប័ន​ និង​ អតិថិជន​របស់ខ្លួន​។​ លើសពីនេះ​ លោក​បាន​លើក​ឡើងថាៈ​​  “ ស្ថាប័នមិនអាចជោគជ័យលើការបរាជ័យរបស់អតិថននោះបានទេ ”​។​

យើងខ្ញុំ​ទាំងអស់​គ្នា​ដែលជាថ្នាក់គ្រប់គ្រង​ សង្ឃឹម​យ៉ាងមុតមាំថា​ បុគ្គលិក​របស់​គ្រឹះស្ថាន​ឯកជន​ វិថី​ម៉ាយក្រូហ្វាយនែន​ ម.ក​ ទាំងអស់​និង​សហការគ្នា​ សាមគ្គីគ្នា​ ជា​ធ្លុង​មួយ​ក្នុង​នាម​ជា​ខ្មែរ​ដូចគ្នា​ ពុះពារ​គ្រប់​ឧបសគ្គ​ទាំងអស់​ ដើម្បី​ឆ្ពោះ​ទៅ​រក​ភាព​ជោគជ័យ​ អោយ​ស្រប​តាម​ពាក្យ​ស្លោក​របស់​គ្រឹះស្ថាន​ដែល​បាន​កំណត់​ថា​ វិថី​ទៅ​កាន់​ភាព​ជោគជ័យ​ ។​